La X.O.T.A. (Xira L’Oriente Trad Alcuentru)

El 6 y 7 de xunu celébrase en Llanes la segunda edición de La X.O.T.A., Xira L’Oriente Trad Alcuentru, festival de música y baille inspiráu na tradición qu’acueye dende les manifestaciones más próximes a la tresmisión oral hasta otres más creatives y vanguardistes. El Grupu Etnográficu L’Oriente de l’Asociación Cultural Llacín -organizador d’esti eventu que cunta col sofitu del Conceyu de Llanes- ta acabante d’anunciar una programación formada por dos talleres, dos espiches, una nueche en danza, tres actuaciones d’agrupaciones tradicionales y tres conciertos.

El vienres 6 a les 19h entama l’eventu en Porrúa con un taller con informantes y Santi Galguera -director del Grupu Etnográficu L’Oriente-; una espicha a les 20.30h y una Nueche en danza con artistes convidaos y escenariu abiertu. El sábadu 7, tamién en Porrúa, la xornada arranca a les 10.30h con unos talleres impartíos por Cris Zagaleja, Soltxu, la Morana de Zamora y G.E L’Oriente y a les 14h hai tamién espicha. Pa los talleres y les espiches hai qu’inscribise enantes nes redes de G.E L’Oriente.

La tarde del sábadu 7 les actividaes treslládense a La Portiella (Llanes). A les 17.30h actúa’l Grupu Folclóricu Trebeyu (Xixón), l’Asociación Belenista la Morana (Zamora), el Grupu Etnográficu l’Oriente y les pandereteres tradicionales Soltxu, Cris Zagaleja y María Vázquez con Marga Lorences.

Conciertos de nueche

Los conciertos d’esti añu van ponelos otra vuelta formaciones de dientro y fuera del país. La nueche del sábadu 7 en La Portiella actúen el grupu zamoranu de música tradicional Ringorrango, el dúu post-folk L-R con un conciertu especial acompañáu de «amigas» y Ailá, propuesta inspirada na música festiva de tresmisión orial de Galicia.